جيغاتينين سوسدوغو گئجه
تازا گلين اولاركن، حيات يولداشيني "اؤته" داغلاريندا چيخان توققوشمالاردا ايتيرميشدي. پيشمرگه دؤيوشچولري، تبريزله سويوق بولاق(مهاباد) آراسيندا كي آنلاشيلان سينيرلاري هر زامان پوزوردولار. قوشاچاي ـ سايين قالا ائلهجهده سايين قالا ـ تيكان تپه(تكاب) آراسيندا يئرلشن كندلره، سسيز گئجهلري تامارزي قويان پيشمرگه لر تام باغو (كوردجه: بابا)لاري "شيخ عبيدالله نهري"،"ايسماعيل سيمتقو" كيمي ايستكلري تورپاق ايدي. تاريخ بويو بيزيم قوناقسئورليگيميز اونلارين چيركين آماجلارينا اولاشماقا كؤرپو اولوبدور. آنجاق فرقه باشچيسي رحمتليك "پيشهوري" دموكرات و اينسانسئور بيريسي اولدوغو اوچون او بؤلگهده گؤرَوده اولان فدائيلره، ايمكانيز داخيلينده توققوشمادان اوزاق گزيب باريشي پوزاجاق هئچ بير ايشه قاتيلمامالاريني ايستهردي، او هر زامان دؤنهدؤنه مركزين بو ايشلرين آرخاسيندا اولدوغونو سؤيلهييب، بوتون بو فيرتانالار مركزدن دوغولور دئييردي.
آنجاق "قاضي محمد"ين وئرديگي سؤزلره راغمن پيشمرگهلر، گون اولمازدي كي آديني چكديگيم بؤلگهلره سوخولوب تالانچيليق ائديب قان تؤكمهسينلر. بو اوزدن يئرلي اهاليايله ياناشي تبريزدهن اورايا گؤندهريلن فدائيلر، ياغيلارا گؤز آچديرماييب، تورپاغا اومانلارا، بينه سالماغا يوخ، يئر آلتيندا ياتماغي پاي وئريرديلر. ائله همين او چاتيشمالارين قيزغين چاغلاريندا كؤنوللو اولاراق فدائيلر جرگهسينه قوشولوب، ووروشوب، وطني قورويوب، شهيد اولموشدو.
قوشاچايي سايين قالايا بيرلهشديرن يولون سول الينده "كؤش" داغلارينين اتهگينده يئرلشن "سئوري" كندينده ياشايان ننهم، قاغام لا[1](آتامين آناسي و آتاسي) "قاراپاپاق" ائلاتلارينين كؤچوش مؤوسيملرينده تانيش اولوب قولاغينا هانسيسا بير قوش ديلي اوخويوب اونو سئوري ده قالارغي ائتميشدي. بيرگه ياشاملاريني بئش ايل سورموشدولر. بيرجه او يئنيشـيوققوشلو ايللرين قانلي اولايلاري او ايكي بختهور گنجي بيري بيريندهن آييرا بيلميشدي.
كندين عادت عنعنهلرينه داياناراق "ارده بير گوردا بير" دئييب، اوشاقلارينا هميده آتاليق ائدهن ننهمين گئچينهجگي، تندير ياپماق، اوشاق دوغوزدورماق، سينيقچيليق و اكينچيليك له تامين اولوردو.
ايندي آلتميش ياشي وار آمما ياشي داها چوخ گؤرونور.
هر بير كيمسه كيمي، فرقهنين چؤكوشو و بيري بيرينين آردينجا باش وئرن اولايلارين آخيني، يوخسوللوغو و مينبير فلاكتي يوردوموزا حاكيم ائتديگي ندهنيندن ائتگيلهنن قاري ننهمي تكجه يوخسوللوقدان تؤرهنن خستهليكلر اونو دوغما تورپاقلاريندان اوزاق سالا بيلميشدي.آمما گلديگي گوندهن،" مني اؤز دوغما تورپاقلاريما گئري قايتارين" دئيهن ننهمين هميده خستهليگينده داها چوخ آرتيش گؤرونوردو.
او تورپاقلارا باغليليغي، تانري قوخولو تبريزيمده ياشاديغينا باخماياراق بير آن اولسون بئله كندين فيكريني اونون باشيندان چيخارا بيلميردي. اورهگي سيخيلاندا "جيغاتي دا بير چيمهرسم، آياقلاريمين سانجيسي ساغالار"، يايين اورتاسيندا باشي قارلي اولان "كؤش داغينين قاريني گؤزلريمه سورمه ائدهرسم گؤزلريم آچيلار..." دئييردي.
آتاميندا مادي دورومو چوخ آغيردي، دام داش ايشچيسي دير. يايدا ايشلهر، قيشدا يايي گؤزلهر...
آنجاق ايندي نه كؤش داغينين آغ قاري اليميزه چاتير نده بئش اوش قيران قارا پول. حكيملرين سؤيلهديكلرينه گؤره ائركن ساغالمادان محروم قالان ننهمين هر ايكي گؤزو چاناقدان چيخمالي اولموشدو، ائله بئلهده اولدو.
سون زامانلاردا توي گونلرينين خاطيرهلرين، زورناـ دؤهول موشايعت ايله "چؤپو[2]" چكديكلريني تئزـ تئز يوخودا گؤروب هؤنكورـهؤنكور آغلايير.
ائشيتديگيمه گؤره داها او كندلرين توي ـ دوگون لرينده چؤپو چكيلمير...
دونن آغشام اوتاغين سسيزليگيني پوزمادان اونو ايزلهييرديم. ائوده تك اولدوغونو سانيب داها دا جراتلنيب داها يوكسك سسله آغلاييب سيزلاييردي. بير آز سونرا هاي ـ كوي ائديب يالاندان يئره، قاپيني آچيب ـ قاپاديب و ايندي اوتاغا گيرميش كيمي داورانديم. گوجله اؤزونو توپلادي، اوزومه گولدو، بير آز دانيشديقدان سونرا، منيم اونا سؤز وئرمهگيمي ايستهدي.
ـ منه سؤز وئر، بالام
ـ سنه سؤز وئريرم، ننهم
ـ نامازي بيتيرديكدن سونرا، منه تاري[3] كيشيدن بير شي ايستهميش اولاجاغيني منه سؤز وئر بالام.
ـ سنه دونيادا ان سئويملي شئلري تانريمدان ايستهمه مگه هئچ قييارام مي؟! ننهم
ـ اوندا، منه بير اؤلوم ايسته هميده چوخ ياخيندا!...
سؤزونو سؤيلهييب سوسدو، منسه ايچيمدن باش قالديران مينبير عوصياني قينيندا بوغماغيم گرهكيردي.
كؤيسونه ساريليب گؤزلرينين گؤرمهديگيندن يارارلانيب سؤزلرينه شوخلوق كيمي قولاق آسديغيمي اونا بيلديرمك اوچون، هئچ اولماديغيم كيمي داورانديم." ننه جيبينده ايدهدن،قاخدان نه وار دير؟" دئديم. بئلهجه تام دئييشيك بير دويغو ايله اورتايا چيخيب اورهگيمده نهلر كئچديگيني اؤرتـ باسدير ائتمهگه چاليشيرديم آمما نه يازيق كي؛ قازمايي، اوراغي، بيزهرچيني نئجه گؤزل تانيديغي؛ پاممبوقدانسا داها چوخ بوزقير دا چاتلاميش چامورا اوخشار اللرينه دامجييان گؤز ياشلاريم منيم نئجه بير دومرومدا اولدوغومو وار گوجوايله بيلينديريردي...
دئمك آتام يايا كيمي گؤزلهمهلي اولاجاق، چونكو هله بوگون قيشين ايلك گونو دور.
ننهمين ياتاغينين باشي اوسته كئچيرم. ياستيغي قوپ قورودور! دئيهسن گئجه بويو آغلاماييب. آي ننه قالخ آياغا، يوخسا گئجيكهريك. حكيمين، گون اورتادان سونرا اورادا اولمايير ها...
آي ننه مني ائشيدير سن مي؟ !
آي ننهگؤرهسن قاراپاپاق ايگيدلري، هلهده جيغيرلاردا دوزلرده، قاش گؤز ائتمهگه بير ديلداش آراييرلار مي يوخسا يوخ؟...
ننه، سسيمه سس وئر، ننه...
گؤره سن دونن گئجه، دونن گئجه، جيغاتي بير دفعه ليك ــــــ؟
چاغداش تبريزلي(ط.ز)
تبريز 1386/11/05
