ارومیه آگاه باش

ایمیل قروپ‌لاری توپلانتی مرکزیمیز اولا بیلر

چاغداش تبریزلی

بیلدیینیز کیمی گونئی آذربایجان‌دا عادی اینسانلار بیر یاندا قالسین، آیدین‌لار بیله واختی‌لی ـ واختیندا دوغرو دوزگون خبرلره اولاشماقدا زورلوق چکیرلر.

یالنیز سوزگج(فیلتر)دن کئچیریلمیش خبرلر، بیرده ایران‌آدلانان اؤلکه‌نین منافئعینه اویغون خبرلر و سیاسی یوروم‌لار، گونده‌لیک‌لرده و قزئت‌لرده یانسیماقدادیر. بیر سؤزله: بوتون یازیلار، اوخوجولارینی بیر کؤله اولاراق اله کئچیرمک ایسته‌گی ایله یازیلماقدادیر.

بو آرادا اؤزه‌للیکله‌ده ادبیاتیمیز اوزرینده چالیشان قزئت‌لر، آردی آردینجا یاییم نومره‌لری چوخ چتین‌لیکله بئش‌ه یوکس‌له بیلمیش اولور. ایچینده‌کی یازیلاری اندرـ دؤنده‌ر ائدیب " اؤلکه‌نین منافئعینه قارشی یازیلارینیز وار " دئیه سوچلانیب قاپانمیش اولورلار.

بئله بیر قناعته گلمک اولار کی ایران آدلانان اؤلکه‌ده یالنیز باش وئرن گئرچک‌لیکلری اؤرت باسدیر ائدیب، یویولموش آرینمیش خبرلری یازان گونده‌لیک و قزئت‌لره یئر واردیر. بو اوزدن ده ساییلاری چوخ آز دا اولسا او یازیلاری اوخویانلارین چوخو، ساختا خبرلری اؤز‌دوشونجه گؤزلوکلریندن کئچیردیکدن سونرا اینانماغا چالیشیرلار. اؤرنک اوچون: " آذربایجان جومهوریتی چوخ جیددی ایقتیصادی کئریز‌له ال‌به یاخ دیر..." یازاندا هلبت کی بونون عکسینه‌دیر دئیه دوشونن‌لر وار. اوزون سؤزون قیساسی:    گؤرونن بودور کی بو اوزدن ایراق قزئت‌لر، دایمی اوخوجولاری ایله بیله گوونیلیر بیر ایلیشکی قورا بیلمه‌میشلر.

بئله بیر دوروم دا یاساق دا اولسا بیر ماهواره(SatelliteReceiver) آلیب دوغرو خبرلری و سیاسی گلیشمه‌لرین یوروملارینی اورادان ایزله‌ینلرین ده ساییسی گئت ـ گئده چوخالماقدادیر. آنجاق بیر چوخ اینسانلار، خبرلری و باش وئرن‌لرله ایلگی‌لی فیکیرلری یازیلی اولاراق اوخوماغا داها چوخ اوستونلک وئریرلر. هر شئی‌ین یاساق اولدوغو بیر یئرده اونلارین گومانلاری بیرجه اینترنت سیته‌لرینه گلیر. چوخ یاخینلارا ده‌ک چالیشقان و زنگین وب سیته‌لره گیریب یازیلاری اورادان اوخوماق چوخ راحاتلیقلا مومکون ایدی. بو دا رئژیمی چوخ راحاتسیز ائتمیشدی.

گئده‌رک آرتان خبرلشمه، یازیشما و ایچری ایله اورتاق بیر فیکیر اورتامی یاراتماغا چالیشان وب سیته‌لرین  ایچری ایله اولان ایلیشگی‌لرینین، رئژیم طرفیندن کسمیلمه‌سی چوخ دا چتین دئییل دی. بیر وب سیته‌سی نه قده‌ر ده زنگین اولسا تکجه دیشاری‌دا(خاریجده) کی آذربایجانلیلار اوچون یارارلی اولور. یئتر کی وب سیته‌نین عونوانین(آدرسین) انگلله‌سینلر(فیلتر)، او زامان ایچری‌یه قویدوقلاری ائنرژی بوشا گئده‌جک.

بئله بیر چیخمازلا(بن‌بست) اوزله‌شن فیکیر صاحیب‌لرینین داها ال‌وئریشلی گؤردوکلری یول، ایمیل قروپ‌لاری ایدی.

بیلیرسینیز کی ایران آدلانان یئرده "یاهو" و باشقا آدلیم سیته‌لری قاپاتدیقلاری زامان، ایداره و دئولت ایشلری ایله یاناشی بؤیوک اؤزه‌ل شیرکتلرینین‌ده مکتوبلاشما ایشلرینده آخساقلیق یاراناجاق. اونون اوچون‌دور کی هرهانسی بیر دوروم اولورسا اولسون ایمیل خیدمت‌لری وئرن سیته‌لرین قاپاتماسی، بوتون اؤلکه‌یی فلج ائده‌جک.

 سون زامانلار وار گوجو ایله چالیشان آذربایجان ایمیل قروپ‌لارینین اوُیه(عضو) لری، بیر گونده اونلارلا خبر، سیاسی یوروم و علمی مقاله‌نی یوز مین‌لرله اینسانین ایمیل قاساسینا(Box) بوراخیرلار. بئله بیر بؤیوک ایش اؤزه‌للیکله‌ده ایچری‌ده کی آیدین‌لاریمیز طرفیندن حرکتیمیزه عایید، چوخ بؤیوک بیر گلیشمه کیمی دیرلندیرمکده‌دیر.

آذربایجانین ایمیل قروپلاری واسیطه‌سی ایله گؤنده‌ریلمیش حؤرمتلی "گونتای جوانشیر"،  "عاریف کسکین"، "بؤیوک رسول‌اوغلو" و ... کیمی اینسانلارین یازیلاری، گونئی آذربایجان‌دا یوز مین‌لرله اینسانین طرفیندن اوخونموش اولور. چکینمدن دئیه بیلریک کی :داها اول‌لر و بو قروپ‌لارین اولمادیغی و یا ان آزیندان مین‌لرله اینسانی قاپسامادیقلاری زامان بونجا دیرلی یازیلاری اوخویانلارین ساییسی بلکه‌ده اوندا ـ بیر ایدی.

ایمیل قروپ‌لارینین یاراتدیغی اولاناق‌لار داها دا گئنیش دیر و بیر بیلگی‌سایار اوزمان‌نین(متخصص) طرفیندن اله آلینارسا اونون اؤنم ینه آیری بویوتلاردان دا وارمیش اولاجاغیق.

ایمیل قروپ‌لارینا اوُیه(عضو) اولانلارا بیر نئچه کیچیک آمما اؤنملی نوقطایی وورغولاماق ایسته‌ردیم.

  گونئی آذربایجاندان دیشاری‌دا(خاریجده) یاشایان میللی فعاللاریمیزا:

یازیلارینیزی سایی و زنگین لیک باخیمیندان آرتیرمانیز اولدوقجا یارارلی اولاجاق.

بیر باشقا سیته‌لرده اوخودوغونوز و حرکتچیلریمیز طرفیندن اوخونماسی گره‌کن یازیلاری، ایمیل قروپ‌لارینا بوراخمالاریز اولدوقجا گره‌کلی دیر.

ایران آدلانان اؤلکه‌ده یاییملاماق ایذینی آلا بیلمه‌ین کیتابلاری و مقاله‌لری، دیشاری‌دا کی(خاریجده کی) میللی فعاللاریمیزین طرفیندن ایمیل قروپ‌لارینا بوراخمالاری، ایچریده‌کی فعاللاریمیزین  ایسته‌گی ساییلیر.

گونئی آذربایجاندا یاشایان میللی فعاللاریمیزا:

گونئی آذربایجانین هر هانسی شهریندن آسیلی اولمایاراق، دیقتینیزی چکن هر بیر اولایین شکیلی و آیرینتیلی لاری  آذربایجانیمیزین ورق ـ ورق یازیلاجاق تاریخی ساییلیر. اونلاری توپلایانلارا یاردیمچی اولماغینیز میللی گؤره‌‌و دیر.

یازدیغینیز هر تور(نوع) مقاله نی یوز مین‌لر‌له سوی‌داشینیز‌لا پایلاشماغین ان دوغرو یولو ایمیل قروپ‌لاری دیر.

یولداش، مسلک‌داش، قوهوم‌ـ اقرابا و تانیدیغینیز هر بیر کیمسه‌یی بو قروپ‌لارا اویه(عضو) ائتمک‌له، قروپا اویه اولانلارین و یارانان فیکیر اورتامینا قاتیلانلارین ساییسینی یوکسلدیب  عینی زاماندا دا میللتیمیزین میللی ـ سیاسی شعورونون چیچک‌لنمه‌سینه یاردیمچی اولورسونوز.

تاریخ بویو ذهنیت و توپلومسال دئوریملرین تمل رولونو اوینایان و اورتاق فیکیرلرین یارانماسینا سبب اولان اورتام لار(محیط لر) و توپلانتی مرکزلری اولموشدور. بو اورتام لارین ان باشیندا گلنی، خیریستیین دونیاسیندا کیلیسالار اولموشلار.

منجه گونومزده ایمیل قروپ‌لارینی، میللی حرکتیمیزین توپلانتی مرکزینه چئوریله بیله‌ریک. بو گونه کیمی ایمیل قروپ‌لاری بیزه ان یاخین دوشونجه و اینانج محورینده و وطن اوغروندا چالیشمایی اؤیره‌تمیش و گلجه‌کده ده داها بؤیوک ایشلری ایمیل قروپ‌لارینین واسیطه‌سی ایله گؤره بیله‌ریک.

گلین بیرلیکده چالیشاق بوتون آذربایجانلیلارین ایمیل عونوانلارینی بو قروپلارا اویه ائده‌ک...

سایین قالا نین دؤیوشچولری

چاغداش تبریزلی

27/03/2008

سایین قالا(شاهین‌دژ) ژاندارمری سی‌ایله اوز به ‌گؤز اولان  اوچ مین متیر‌لیک‌ باغچانین اورتاسیندا یئرلشن بیر ائوده، آذر آیینین سون گونلری، یئری گؤیو قارلی کولک‌لر اله آلمیش، قیراـ بوز بیر آخشام چاغی قاش قارالاندا دوغولدو. اوچ ایل سونراسی دا آتاسی رحمتلیک الله‌وئردی‌عمی‌جان قوشاچایین(میاندوآب) گئری قالمیش بیر تئداوی مرکزینده، خومپاره تَرکئشیندن آلدیغی یارالارین نتیجه‌سینده دونیاسینی دئییشدی. "واختیندا داها ایمکانلی بیر خسته خانایا یئتیرسه‌یدیز بلکه‌ده یاشایا بیله‌ردی..." دئییردیلر: حکیملر. نه یازیق کی او دؤنم لرده سویوق بولاق(مهاباد) خسته‌خاناسینا اولاشماق هئچ ده راحات دئییل‌دی. قوشاچای ـ سویوق بولاق یولو چوخ اوزاق زاماندان بری یامان تهلوکه‌سیز اولموشدو؛ یولا دؤشه‌نن مین‌لر، اونلار لا آرابانی هاوایا اوچورتموشدو.

آذربایجان‌داکی، کوردوستانین (سؤزده) دئموکرات پارتی سینین قودوز پیشمرگه بیرلیک‌لری، سویوق بولاق شهرینی تمامی ایله اؤز کنترول‌لارینا آلمیشدیلار. چوخ داها اسکی‌لردن اوزو بری سویق بولاغی بیزلردن تمیزله‌مه‌گی باشارا بیلمیشدیلر؛ ائله اودور کی سویوق بولاق‌دا ساییمیز یئترلی دئییل دی. آمما  سویوق بولاق(مهاباد) ین قوزئی باتی‌سیندا دیره‌نیش‌لر سورمه‌کده ایدی. بوتون سولدوز، ممدیار الیمیزده ایدی.

جیغاتی چایینین بو تایی یایلیم آتئش‌لره، خومپاره‌لره توتولموشدو. الی یالین کندلی نه ائده بیلر کی؟. آتام دئییردی: " ائشیتدگیمه گؤره:بونا اوخشار ساواش‌لاردا، قوشاچایین گووران لاری قازما، درگز و کرکی‌لرله باسقین‌چیلاری قیمه‌ـ قیمه دوغرامیشدیلار". ایندی ایسه خومپاره‌لرین اؤنونده سوسموشدو: اوراق لار.

بیر گون خوشقدم خالاما وای خبری گتیریب، سوسماغینی ایسته‌دیلر. یاس مراسیملری بیله قورخو دولو قاپالی بیر ائوده کئچیریلدی. چونکو سایین قالا اؤزوده، ائله دئدیگین تهلوکه‌سیز دئییلدی.

الله‌وئردی‌عمی‌جان بویلو بوخونلو، یوغون بئیغ‌لی، ایستی بیر کیشی ایدی. اؤزوده "قمیش‌لی " ده دوغولموشدو. پئشه‌سی مئشه‌بَی‌لیک ایدی؛ یاسا دیشی اووچولوق ائده‌نلری یاخالاییب زنگین دوغاللیقلاریمزی گؤز ببک‌لری تک قوروماغی چوخ یاخشی بیلیردی.

بوتون داغلاری دره‌لری اووجونون ایچی کیمی تانیییردی. خوشقدم خالامی دا "آلی‌چین" کندینده بولاق باشیندا گؤروب به‌ینمیشدی.

بیر گون جیغاتی‌نین یاخینلیغیندان یورویه‌رکن، قورشون آچیلما سسلری ایله دیکسیندی. چالی‌لارین آراسینا سیغینمیش بوتون قوشلار تلم‌ـ تلسیک گؤیه یوکسلدیلر. قاچاراق اؤزونو فاجیعه‌نین یاخینلیغینا یئتیردی. چایین بو تاییندا سؤزون بوتون آنلامی‌ایله بیر تراژدی یاشانماق دا ایدی. دام‌لارین تاوانی چؤکموش، آت‌لار هورکموش، باغری اوزولموش اوشاقلار بوغوق سسلر‌له آغلاییردیلار؛ شاشقین کیشی‌لر ایسه نه ائده‌جکلرینی بیلمیردیلر. اؤلولرین ساییسی گئت گئده آرتماقدا ایدی. بوتون کند توزـ دومان توستو ایچینده ایدی. واختی اؤلدورمه‌دن چایا ان یاخین اولان بیر قایا نین آرخاسینا سیغینارکن بیرطرفدن ده فیشنگ قاطارینی سییریب قوشا لوله‌سین دولدوردو.

اوتایا توشلانمیش توفنگی ایله  بوتون مرمی لری بیته‌نه دَ‌ک دوشمنه قورشون یاغدیردی نئچه یاغی گبرتدی. اورادان قورتولامایاجاغینی چوخ یاخشی بیلیردی. مرمی لری سونا چاتدیقدان سونرا توفنگی دوشمنین  الینه کئچمه‌سین  دئییه بوتون گوجونو قولونا ییغیب توفنگینی قایا یا چیرپتدی، توفنگ دارما داغین اولدو؛ سونرا دا دورمادی، الینی اوزالدیب جئبینده‌کی ساپاندی چیخاریب بو سفر گؤره‌ر ـ گؤرمزجه سینه داشلاری یاغدیردی دوشمنه ساری.

حربی تعلیمات گؤرمه‌میش کندلی لرین بیر قیمسی اؤزلرینی الله‌وئردی‌عمی‌جانا یئتیرمه‌دن قورشونلاندیلار. الینه دَیه‌نک آلمیش بیر یئنی یئتمه نین اؤزونو الله‌وئردی‌عمی‌جانا چاتدیرما چابالاری بوشا گئتدی، اوره‌ییندن ائله ووردولار کی پارام پارچا اولان کؤیسوندن سیچرایان قانلار، الله‌وئردی‌عمی‌جانین‌دا اوزونه ساتاشمیش اولدو. الله‌وئردی‌عمی‌جانین یاردیمینا گله‌بیله‌جک سون شانسی ساییلان یئنی یئتمه قانینا بویانیب دیغیرلاناراق جیغاتینین قوینونا دوشدو. بوتون قانی چایا سیزیردی. جیغاتی آغیر آغیر آخیردی.

آشاغی ـ یوخاری ایکی متیر آرالیقدا یئره دوشن خومپاره‌نین پارچالاری، آجیماسیزجاسینا اؤز گؤره‌وینی یئرینه یئتیرمیشدی. الله‌وئردی‌عمی‌جان ایتیردیگی قاندان دولایی باییلمیشدی. ان یاخین یؤره‌لردن باشینا یئتیردیکلرینده، سون نفسلرینی چکمکده ایدی.

بوتون کند سیلینیب یوخ اولدو. قوشاچایا خبر گئدیب چیخانا کیمی، قودوز پیشمرگه‌لر آردان جیرمیشدیلار، آخی اونلار الی توفنگ‌لی قوشون لار لا ساوشماغی باجارمیردیلار.

یوغون توزـ دومان آلتیندا سوی قیریم سرگی‌سینه دؤنوشن مئشه‌لر،دره‌لر، دوزلر قوروقچو سوز قالمیشدی.

 ***

خوشقدم خالام دا کوپه پئندیری ساتماقلا، یئمه‌ییب یئدیردیب، یاشاری بویا باشا چاتدیردی.آمما قیسمت اولمادی یاشاری‌ین تویونو گؤرسون.

یاشار عاغیللی باشلی بیر گنج ایدی . اؤزو کیمی بیر اؤیره‌تمن قیزلا ائولندی. سولماز خانیم ایسه چوخ آیدین دوشونجه‌لی بیر اینسان ایدی. اوچ آی یای تعطیلاتی قارداشی احمدین یاشادیغی تیکان تپه یه (تکاب) گئدیب، تیکان تپه‌یه یاخین کندلرین فولکولورون توپلایاردی. بو گونه کیمی قلمه آلدیغی اون دؤرد کیتاب، اورمو یاییم ائولرینده ایشیق اوزو گؤروبدور. آمما بو ایل یایی ائوده اوتوروب کیتاب اوخوماقلا کئچیرتمیشدی، بویلولوغو اوزونده‌ن.

یاشار ا گلدیییمیزده مسلک‌داشی جلیل له بیرگه سایین قالا دا یاریم گیزلی بیر معاریف‌لندیرمه ایشلری گؤروردو. بو چالیشمالارین سونوجوندا شعرگئجه‌لری، ادبیات اوجاق‌لاری یارانماغا باشلاییب دیر.

یاشار لا جلیل دن تورک دیلینده یازیب اوخوما اؤیره‌نن لرین بیر نئچه‌سی،آدلیم درگی‌لرده چوخ دیرلی یازقیلار چیخارتدیبلار.

کئچمیش "کومله" و" دئموکرات" پارتی‌لرین سویغونچولاری دونلارینی دئییشدیره‌رک آذربایجانین ازلی و ابدی تورپاق‌لارینی اله کئچیرتمک نیتی ایله "پژاک" آدی آلتیندا چوخ بؤیوک بیر چابا خرجله‌ییرلر.

یاشار لا جلیل قوشاچای ـ سایین قالا ـ  تیکان‌تپه شهرلرینین میللی حقلری ائله‌جه‌ده تاریخی تورپاق‌لارینی ساوونماق اوچون بیر تشکیلات چاتیسی آلتیندا گئنیش قاپساملی چالیشمالار ا قول آتمیشلار. اؤرنک‌ین: آرا سیرا یایدیقلاری بیلدیرگه‌لرده پژاک تئروریست‌لرینین یاخین و اوزاق مدتلی پیلان‌لارینی یئرلی اهالی‌یه چاتدیریب آییق‌لیق یارادیرلار.

بیر آی اؤنجه گئجه یاریسی ائوینه تؤکولوب یاشاری یاخالادیلار. ایلکین سوروشدورمالاردان سونرا اونو اورمو یا گؤنده‌ردیلر. یاشارا اورمودا قوندارما و ایچی بوش ایتیهام لار لا ایلگیلی بیر ایل زیندان کسدیلر.

سایین قالا هلیه‌لیک چوخ چالیشقان اوغلوغونو ایتیرمیش سه‌ده، سایا حئسابا گلمه‌ین اؤیره‌نجی لری، یاراتدیغی مدنی حرکین دوامچی‌لاری یارانان بوشلوغو دویمازجاسینا دولدورماقدادیرلار.

چرشمبه آخشامی دان سؤکولنده یاشارین بیله‌گینه کلفچه تاخیب اورمو دوستاقلیغینا آپاریردیلار؛ سایین قالا دان باشقا هئچ نه‌یی دوشونموردو. بو آرادا سایین قالانین دوغو حیصه‌سینده یئرلشن کیچیجیک بیر ائوده اوغلو تورال چوخدان دوغولموشدو.