چاغداش تبریزلی
(02.05.08)
- آتاما لعنت بیرده
سنینله ال ـ اله سورتسم. ایکی نفرین گچینی چالیرام، بیرینین پولونو میرزه قمبرین
تارییا وئردیگی جان تکین، گوجو پیسینن وئریرسیز.
- سنین ناخیرچیلیقدان
سونرا هئچ نهیه اردمین یوخدو. آل بو اوناوچ مینی، جهننم اوُل گؤزومون
قاباغیندان.
یورغون جانینی گوجو
ایله ائوه یئتیردی. ال ـ آیاغینی یوماغا هئیری قالمامیشدی. تومان کئشی ایله ایکی
پارچاسینی بیری بیرینه یومموش سینیق رادیوسونو آچدی، پیلهتهسین اوتلادی. چوخ
کئچمهمیشدی کی رادیونون زیررا ـ زیررینی خفهلدی. پیلهتهنین اوستونده پؤشلهین
قاینار سو ایله، گئجهدن قالمیش تاواسینی یئیخالاییب ایکی شهر یومورتاسین چالدی
تاوایا، سونرا دا تامسینمادان یئمهگی بیر تهر یئدی. هله چؤرهک خیرتدهگیندن
یئنمهمیشدی کی جئغالاسینی(سیقارین) آلیشدیردی.بو گونه کیمی گؤردوگوم ان تؤر ـ تؤکونتولو
اوتاغی، توستو یه بوروندو.
"هاچاسو[1]"
دا اولدوغو زامان هئچ ده بئله دئییلدی. اوستهلیک ساققالینی قیرخماغا اؤزو
دئمیشکن:" واخت تاپا بیلمیردی".
اؤزونو چیخماقلا، سون
دؤنه بایرام آخشامی سوپوردوگو ائوینه بیرجه دونن آخشام چاغی "عیمران بی
قیران" گلمیشدی،دالی دوشدوگو دامین کیرایهسین ایستهییردی، دیل ـ آغیز لا
بیر تهر باشیندان ائلهدی.
بو گون ایسه اوتاغیندا سایخاشلیق
حؤکم سورور. آناسینین اورهگی خستهلندیکدن گرهک چوخ قازانیب آز یییهیدی. سون
دفعه آناسی ایله مهابادین او خارابا قالمیش خستهخاناسیندا گؤروشموشدو. حکیم لر،
همشیره لر روشوه ایستهییردیلر، آناسینا یاخشی باخماق اوچون. قوشاچایا(میاندوآب)ا
هلهده وارکی تؤرهلی بیر خستهخانا سالاجاقلار... گرهک گئدیب دیلیمیزی
قانمایانلارین ال ـ آیاغینا دوشهیدیلر.
نه واخت دیر کی عاییله
سیندن هئچ خبری یوخدور. گاهدان" دیلیمه داش تورپاق، اؤلسهیدی چوخدان سسی
چیخمیشدی..." دئییب کدرلهنیر.
هاچاسو ایله دانیشماق
اوچون گرهک چیخیب گئدهیدی " ماللا زئینال[2]"
داکی تئلفون مرکزیندن زنگ آچایدی سایین قالا(شاهین دژ) داکی داییسی جاواد گیله، او
یازیق دا اوغلو رجبی "ائژ" موتورو ایله تلم ـ تلهسیک گؤندهریدی
هاچاسودا آناسی روقیهنی موتورلا گتیرهیدی سایین قالایا، داییسی گیله. او بیری
یاندان احمد بیر ساعات سونرا یئنی دن سایین قالانی توتوب آناسی ایله دانیشا بیلهردی.
بو گون اورهگی
سیخیلسادا زنگ آچاجاغینی دوشونموردو، اونا گؤره کی بو قازانج لا دامینین کیرایهسین
وئریب قارنینین یاوان چؤرهگین آییردیغیندا، عاییلهسینه گؤندهرهج، یئرده بیر
شئی قالمیردی.
رحمتلیک آتاسینی جیغاتیچاییندان بالیق توتارکن
قورشونلاییب اؤلدوردوکدن سونرا بوتون ائوین
گؤزو اونا دیکیلمیشدی. هاچاسو دا کی یئرلری قوراخلیق دان دولایی گلیر قایناقلیلیغین ایتیرمیشدی.
هاچاسودان قوشاچایا، قوشاچایدان تبریزه ساری یولا دوشنده، اوره گینی هاچا سودا
بوراخیب گلمیشدی.
یازین اورتاسینا آزالیب
هله نئیسان یاغیشلاریندان خبر یوخدور. هله دهکی هلهدیر سوسوز چؤل لره بیر دامجی
یاغیش چیله مهییب. یای گیرمهمیشدن یئر گؤیدن اود یاغیر.
ایکینجی
جیغالاسین(سیقارین) آلیشدیریر.
بو نئچه ایل آردیجیل
قوراخلیقلارین سونجو قیتلیق اولموشدو. یوخسوللوق باش توتوب گئدیردی. هر یئر کیمی
هاچاسو دا هر گون بیر کندلیسین ایتیریردی.
آرتیق بولاق باشیندا
قیققیلداشیب گولوشن قادینلارین سسی یئرینه، یالنیز قوخوموش چاییر جمدکلرین
باشیندا کورا میلچکلرین ویزیلتیسین ائشیتمک اولوردو. ایللرین اؤتوشو، سو
شاریلتیلارینین سسینی ایدراکلاریمیزدان پوزولمایا یاردیمچی اولوردو.
کئچن ایل سویوق دوشنده
عمیسی اوغلو ایسفندییار تبریزه گلیب اونونلا بیرلیکده قیزیلچی بازارا گئدیب، نیشان
اوزوگونو ساتیب کنده دؤنموشدو. ایسفندییار بو ایل اونایکینجی آداخلیلیق ایلینه
گیریر آمما یوخسوللوقدان ایندیینهدک ائو ائشیک قورا بیلمهییب.
جیغالاسینی نه گوجو وار
سوموراراق بیرده "قالا کؤن[3]"
دهکی باجیسنی خاطیرلاییر. باجیسینی بخت
ائوینه گؤندهرنده بونون اونبئش یاشی اولاردی آمما چوخ شئیلری بیلیردی، بیلردی
کی یامان گونون اوزو قارالماییب هلهده کی وار...، بیلردی کی جئهیزسیز زاتسیز
گؤندهریلن باجیسنین آغلار گؤزلرینین ایچینه باخماق هئچ ده راحات دئییلدیر. ایندی
یازیق آرواد آناسی ایله سئچیلمیر، قارا گون ساچلارینی یامان آغاردیب.
داها چکمهیه جیغالاسی
قالماییب.کیرپیکلری آغیرلاشیب کدرلی گؤزلرینه یوخو گیریر.
قاش قارالیب، سویوق
پالاز اوستونده میشیل ـ میشیل یاتیب. آشاغی یوخاری اوچ ساعات دیر داش کیمی یاتیب، لاپ اوچ مین
ایللیک"لومبه تپه[4]"
تکین.
نه گؤی گورولتوسو نه ده
هر هانکی بیر سس اونو آییدان دئییل.
بلکه سوواق دامینین
تاوانیندان اوزونه چیلهین بیر یاغیش دامجیسی اولماسایدی داها آیاغا
قالخمایاجاقدی.
[1] سایین قالا(شاهین دژ) ین
یاخینلیغیندا اولان بیر کندین آدی دیر.
[2] تبریزین یوخسول یؤرهلرینین بیرینین آدی دیر.
[3] سایین قالا(شاهین دژ) ین یاخینلیغیندا اولان بیر کندین آدی دیر .
فارس فاشيستلري بو کندین آدینی احمد آباد ا چئویریبلر.
[4] سایین قالانین ایچریسینده اولان و اسکی مدنیتلردن میراث قالمیش بیر تاریخی
تپهنین آدی دیر.
