غدار حاکیمله پینهچینین ناغیلی
گونلرین ترس
بیرگونو چوخ اوزاقلاردا غریبه بیر اؤلکه وار ایدی. او اؤلکهنین باشچیسی ان غدار
حاکیملرین اوزونو آغارداجاق قدهر غدار ایدی. آز دئییم دوز دئییم، میللتین قانینی
شیشهیه توتموشدو.
گونلرین بیرینده
هر کسین اولدوغو کیمی یوخسول، آما بیرآزجا دلیقانلی بیر پینهچی جانینی اوووجونا
آلیب، اؤزونو حاکیمه چاتدیرار. پینهچی، حاکیمدن خزینهسینین آغزینی آزدا اولموش
اولسا آچماسینی ایستهر، هرکس آیاق یالین گزیر، منیم ده کی یاشماغا الیم هئچ قیزمیر دئییر، پینهچی.
سن دئمه حاکیمده
ائله بو آنی گؤزلهییرمیش!. حاکیمین بویوروغو ایله یالتاق جلادلار، زاواللی پینهچینین
آغزینی حاق سؤز دانیشدیغی اوچون تیکیرلر!!!.
داها سونرالار
هر یانا ، اللهدان سونرا هئچ کسین اولمادیغی یئرلره بیله، اعلان داغیدیلدی.
" بو آندان اعتیبارن، ائولرینیزین ایچهریسیده داخیل اولماقلا، هئچ بیر
یئرده،هئچ بیر کسین ،دانیشماغا هئچ بیر حاققی یوخدور...! دانیشان هر بیر کسه، پینهچییه
کسیلن جزانین تایی، یادا داها دهشتلی بیر جزا طرزی کسیلهجکدیر!. حؤکم الله اوغلو
الله یعنی جناب حاکیمین حؤکمو دور!." یازیلمیشدی اعلان لاردا.
گونلر آجیدا
اولسا کئچیردی. بیر گون پینهچی اوغلو پینهچی یئنی بیر فیکیر اورتایا قویار، هامی بگنهر، اونلار داراشارلار کاغیذ ـ قلم
آلارلار. سؤزلرینی دانیشماقلا دئییل یازماق لا بیرـ بیرلرینه چاتدیرارلار.
گونلر اؤز آخاری
ایله کئچر، هرکس آنجاق یازار و اوخویار، چوخ کئچمهدن اوخوماغا آییردیقلاری واخت،
ایستر ـ ایستمهز آرتار. گؤرونولمزلر بیر یاندا قالسین، گؤرونن چوخ شئلر دئییشر.
کیتابلارین ساتیشی آرتار، یاییم ائولری آچیلار. بیر چوخ یئنی ایش مرکزلری یارانار.
میللتین کئچینهجگی آز دا اولسا اوزه دوشر.
ایللر اؤتوشر، آغاجلار
چیچک وئرهر، قوشلار یووا قوروب بالا چیخارار. بیزیم اؤلکهدهده چوخ دئییشیکلیکلر
اوز وئرهر. نئجهده باجاریقلی یازیچیلار اورتایا چیخارلار. بئلهده قالماز،
ایناندیریم سیزلری کی اوشاقدان بؤیوگه هامینین بئینی تپ ـ چئویر اولار. آنجاق
یاساقلانمیش دانیشیقلاردان محروم قالان اوشاقلار، آنادیللرینی کیتابلار لا
اؤیرهنهرلر.بو چوخ اوزوجو دور. اوشاقلاردا دویغو آخساقلیغی یارانار، حسرت
قالدیقلاری آنا دیللرینین دانیشیق فورماسینا اولان سئوگی لری اونلارین کؤنلونده هر
گئچن گون داهادا آرتار.
آنجاق یالتاق
لار اوخوماز لار، بو دؤنهده اینسانلیغی، میللتینی و چوخ شئیلری بیر قارین یئمهگه ساتارلار.
گئدهرک دئییشن
دورومدان راضی قالمایان همین یالتاقلار، کاغیذ ـ قلمین سئحیرکار قووهلره مالیک
اولدوغونو بیر تهر دوشونوب، دؤردونوده اوستونه قویوب حاکیمین قولاغینا
پیچیلدارلار.
گون باتاندا
یئنی قرارلارین وئریلمهسی ایله اورتایا چیخان یاساقلامالار، داغیدیلمیش اعلان لار
لا میللته چاتدیریلار. "
صاباح گون چیخاندان اعتیبارن کاغیذـ قلم و کیتاب داشیماق، همیده یازیب اوخوماق ،
الله اوغولو الله یعنی جناب حاکیمه اهانت سانیلاجاق دیر و بئلهجه گوناها ال
بولایان هر کسه ان آزی اؤلوم جزاسی وئریلهجک
دیر. " !!!
حاکیم
جنابلاری!!! چوخ شئیلرین دئییشدیگیندن خبرسیز ایدی. او اینانیردی کی هر شئی،
اونون ایستهدیگی کیمی اولاجاق دیر.
گون چیخدی.
گونلر اؤتدو. گونلر، هفتهلر و آیلار کئچدی. میللتین ایرادهسی سارسیلمادی.
یاساقلامالارین ایجرا اولونماسی ائرتهلندی،وعدهوئریلن گونلر گلیب چاتدی، اؤلکهده
هئچ نه دئییشیلمهدی، هر هانکی بیر یالتاق ویا جلاد، میللتین ایرادهسینی اؤنلهیهجک گوجو، اؤزونده حیسس ائتمیردی. اؤلوم
هدهسی بیله، میللتین کیتابا اولان دوشگونلوگون اونلاردان آلا بیلمهمیشدی، اوستهلیک
هامی دانیشیردی. اینسانلار، زوراکی حاکیمییته دئییل، یالنیز اینسانلیغا یاراشار
یاسالارا بویون اَییردیلر و اؤزگورجه یاشاماغین باهاسینی نه اولورسا اولسون وئرمگه
حاضیرلانمیشدیلار.
حاکیم، اؤلکهده باش وئرنلری ائشیدرـ ائشیدمز، قورخویا دوشدو،
شاشقین حاکیم تلم ـ تلهسیک اؤزونو سارایین ایچری قالاسینا چاتدیردی. ایچهری
گیریب قاپینیدا برک ـ برک باغلاتدیردی. جانیندان سویق تر آخیردی. قورخودان نه ائدهجگینی
بیلمیردی. دوروب یئنیدن اوتورودو. چوخ کئچمدی کی باشی دؤندو، گؤزلری قارالدی و
دیغیرلانیب ائله اورداجا اؤلدو.
بئلهجه میللت
قورتولوشـآ چاتدی. اوشاقلار دیل آچدی ،
وار نعمت باشلاریندان آشدی ـ داشدی و هامی اؤز آرزوسونا چاتدی.
آلا قاراقا
یوواسینا یئتدی،بیزیم ناغیل ایسه ائله بورداجا بیتدی. اوکی قالدی یالتاق لارا،
اونلاردا گئتدی بیزیم ناغیلین زیبیل قابیسینا.
چاغداش تبریزلی
12/10/2008
