اؤلومون
بیر آددیملیغیندا
چاغداش تبریزلی
01.09.2008
سونونجو قارانلیغین همن آردیندان، زامان دایانماغا باشلادی؛
دایاندی وگؤزلریمین اؤنونده یئنی بیر دونیا جانلاندی. بورادا هامی باشینا دؤیور.
ائله گؤرونور کی منده باشقالاری کیمی ایستهمدن بو دونیایه
توللانمیشام. هر یان گؤزومه تانیش گلیر؛ بو بؤیوک باشاری دیر. آنلامیشام، بورا
واختی ایله بویا باشا چاتدیغیم یوردوم دور. بونجا دئییشیکلیک لره معروض قالمیش
یوردومو تانیماماق، قیناماغا یول آچمیر.
بورادا سئوگی ایتیب. بورادا بوز ساتیلیر پئیرلانتا یئرینه.
آنالار آغلاییر، آتالارـ سا سیقاری باغ وورور سیقارا، بورادا.
کیچیجیک بیر اوشاغی یئنیجه توپراغا تاپشیرمیش یاسلی بیر یولچوـ سوروسونه یاخینلاشیرام.
اینانیلماز دیر. یاخینلاشادیقجا بیرـ بیر
محو اولورلار. بیرجه آناسی قالیر.
- آنا بورایا، سیزلره، نه اولوب ؟
- بوتون باغلاریمیز قورویوب، اکین یئرلریمیز سه دوزلاغلیق
لارا دؤنوشوب...
یولا دوشورم، یئریدیکجه، بورالی اولورام، سانکی چتینلیکلر
باشماق لاریمی دلهرک آیاق دامارلاریمدان دیرماشیب، اؤزونو اورهگیمه چاتدیریر.
هر نه بیزیم علیهیمیزه ایشلهییر، داغلار، گونش،یئل بیردهکی
اؤلومله چکیشده اولان چایلاریمز.
آنالار هر گون چوخ گئجدن آیاغا قالخیر، دوز سوپورورلر حیط
ـ باجادان و بئلهجه نه آتماق، ندهکی اوتماق اولان یئنی آمما چوخ یوروجو بیر
گونون آجی حئکایهسین یئنیدن تئکرارلاییرلار.
دوز، واختیایله آدی سایقی ایله آنیلاردی ، ایندی ایسه یئرـ
گویو بورویوب دور، اوستهلیک دوغورودوغو فلاکتلر له، دوز آدی گلنده آنجاق نیفرت
روحوموزو اویادیر.
بو آرادا اسن یئللر آنجاق دوزون داها چوخ یاییلماسینا
یاردیم ائدیر. دئییلن لره گؤره بو فلاکت، یوردوموزون باتیسیندا یئرآلمیش آدلی ـ
سانلی بیر شورگؤلون قوروماسی ایله
باشلانمیش دیر.
اوز گتیرمیشیک گئجه یاشامینا ، قارانلیق دوشنده سئوینیریک
چونکو داها دوز گؤرمهیهجه ییک ، هر یئری
دوز گؤتوروب دور، واختیندا لوکس آرابا آلیب ائویمیزین دئکوراسییونون دئیشدیرمکله
اوغراشیردیق، هله اونوتمامیشام "آماندیر گؤل قورویور ها، بیر ایش گؤرمهمیز
لازیم دیر!" دئینلری اله سالمیشدیق.
او گون کی ایگیدلیکلر ایچرن ناغیللاریمیزی اونوتدوق،
یامان گونوموزه خوش گلدین دئدیک. ایندی ایسه گرهک ناغیللاریمیزدا، واختی ایله
یوردوموزدا گؤرونن یئشیللیکدن، اکینساحهلریندن، آخارچایلاردان، آیازلی گئجهلردن،
برکتلی باغلاریمزدان سؤز آچاق...
اوزلشدیگیمیز اینسانلاردا دری خستهلیک توتمایانینا
راستلاشماق اولمور، ایندی هامی بیرلشه بیلیر، ایندی یوز مینلرجه اینسانی بیر یئرده گؤرمک اولور.
ان سون اومودوز ساییلان بیرـ ایکی بولاق قالیب دیر، هامی جوموب اورایا، اورتایا
چیخان سوسوزلوغو اؤدهمهین بولاقلارین باشیندا ننهـ بالانی گؤزلهمیر،هرکس تئز
سویا چاتسین دئیه او بیریسی ایله داوا دالاشا گیریر.
گؤلده دوشرگه سالماق اوچون بورالارا گلمیش آنجاق گؤلون
قوروماسی ایله اوزلهشن یورغون ـ آرقین کؤچری قوشلاری، حالال ـ حارامینا باخمادان
اوولاییب یئییریک. دوزلاق چووغانی نین کؤتوگو ایله ده پالتارلاریمزی یووروق، شورا
لکهلری پالتارلاریمیزین بزهگینه چئوریلیبدیر.
یاغان یاغیشلار هر یانا سپهلنمیش دوزلاری یوواراق، دوزلو سولاری آغاجلارین کؤکونه چاتدیرار و بئلهجه
ان سیمیتن آغاجلاری بیله قورودوب محو ائدر. ائله بونا گؤرهدیر کی یاغیشین
یاغماماسی اوچون دوعالار ائدیلیر، یاغیش یاغمایان هر آیین سونو دا بو بؤیوک شانس
اوچون قوربالیق وئریلیر.
اؤلومون قاشی می، گؤزو مو اولار؟ بورادا هر شئ اؤلموش
دورومدا دیر. آرتیق کیل ـ کؤچهمی توپلاماغیم گرهکیر...
***
گونش چوخدان اویانیب دیر، من اؤز ایرادهم له یاتاغیمدان
قالخیرام، پنجهرمین اوتایندا ماوی گؤی وار، حاجی لئیلکلر، ارسینبوغاز[1]لار و فیلامینقولار هاراسا
کؤچورلر، سانکی گوج آلیب لار. سرین بیر یئل اسیر و سئوینج گتیریر، دئمک یاشاییرام،
اومود دوغولور ایچمده.
[1] گونئی آذربایجانین باتی سیندا یئر آلان "سایین قالا"(شاهین دژ) و
یؤرهلرینده، قو قوشونا، "اَرسین بوغاز" دئییلیر.
